وعهد الله - محمد ضباشه

وعهد الله
محمد ضباشه
( معدلة)
وعهد الله انا فيكى
مدفيكى .. وعايش أنا بردان
وعهد الله أنا ليكى
مهنيكى .. وأنا الشقيان
وعهد الله أنا بيكى
وبين الناس .. بقيت متهان
عشان مصرى
ولا مصرى عشان
أنا جبلك
أنا نيلك
انا قمرك
انا شمسك
أنا أيديكى .. وأنا الفنان
أنا اللى برسم كل يوم صورتك
على جبينى
فشدينى .. لحضن حنان
لبر أمان
بلاش ترمينى فى ايديهم
وفى عنيهم مصيرى بان
يا أما عايش بلا مأوى
طب فين التقوى والأحسان
يا أما بصارع على لقمة
وفى الزحمة ونار بركان
بتاكل كل اللى فى ايدية
ومالية .. فى البلد مكان
وعهد الله أنا ميت
ماعارف حتى فين قبرى
ودايما أقول يا ست الكل
أنا مدفون مع صبرى
وبالعربى
بقيت عربى .. وأنا مذهول
وخايف اغوص فى احوالنا
ولاحوالنا
بقيت مهبول
بقيت مخبول
بقيت ميت ومش عايش
وعايش على الصراخ على طول
على تقسيم
على تعتيم
على ترميم
على حكام ياربتها تقول
وصوتها تسمعه ودانى
ونادانى اللى بات مشلول
وأعمى
وأخرس
وقلنا
بكرا .. وبالعزيمة نطول
نقول
نصرح
نمد ايدينا فى بطن الغول
نمد ايدينا
وأنا المسئول