حبة سياسة

مدعين السياسة بيمثلوا علينا
والبطل عاوز يظهر على الأفيش
ويفهم الناس انه جاى علشانهم
وعينه أصلا على كرسى الشويش
وانه هو بس اللى بيده يغير
علشان الناس تعرف تعيش
وباين كله ضحك علينا
ولا باين علينا بقينا كلنا دراويش
حبه منهم على اليمين مع النظام
همه سادة وشايفنا كلنا حرافيش
وحبه تانيه منفخونين على الشاشات
وعملوا أيه أصلا مافيش
وحبه تالته
وحبه رابعة
متفرقين وبقوا فى البلد تناتيش
كل فئة بتخدم مصالحها
واحنا دايخين على لقمة عيش

أنا قلت أعمل زيهم وأفهم حبة سياسة
يمكن تضرب معايا وأكون رئيس
ولا حتى رئيس وزارة لما أكبر
أتجوز وأعمل عريس
ولا على الاقل وزير وماله
أه أحسن ما أموت فطيس
ويبقى نهارى مره أبيض
بدل ما هو أسود غطيس
ولا الحكايه يا أبنى سلطة
وحكايتهم ما بتنتهيش

يا عم انا راضى بأى حاجة
بس المهم أعيش سعيد
ومش مهم مين هيحكم
ومين شاطر ومين بليد
الحكايه باينه واضحة
والقانون محطوط شديد
والترزى اصله شاطر
وخلى القانون جديد
لواحد بس عارفه
والناس تولع تقيد
المهم الكرسى يبقى
فى ايديهم ما يروح بعيد