أخونا عمى روميو

أخونا عمى روميو
شعر : محمد ضباشه

أخونا عمى روميو
عازمنا على الفطار
روحنا ندارى كسوفنا
ونأكد لعب الصغار
مه هو الديك بتاعنا
وواخد على الهزار
مع أزارة خمرا واقفه
وكام فلة سيجار
قعداته تملى وسخة
عارية من الوقار
وفى الاخر أيه هيجنى
منها الا الدمار

دخلنا جوه شقة
حيطانها قايده نار
وفيها ريحة كأبة
وسجن من الدوبار
احنا يدوبك قعدنا
سابنا لبعيد وغار
مع رنه على الموبايل
وكلام خلف الستار
خليها بكرا أحسن
ما أيامنا لسه طوال
وبعد الرنه رنه
والصبر منا طال
قاعدين بقالنا كتير
ما عدى علينا فار
يقول اهلا وسهلا
شرفتوا حتى الدار

وصوت أنين بعيد
بينادى على القهار
لحد أمتى الصبر
وأعرف اخدلى قرار
مع زوج الله يسامحة
غاوى لعب القمار
وكل يوم مع واحده
ونسى أصول الكبار
قتل أحساسى فيه
وكأنى جاموسه عشار
تاكل بس وتولد
وعايشه شاربه المرار
ونهارى زى ليلى
دموع تسيل انهار
تغسل هدوم نظيفة
على واحد توبه صار
أوسخ من الوساخة
وكل يوم فى حوار
خلى حياتى كئيبه
ودفنى جوه غار
بتمنى اكون سراب
أو حتى أسير بخار
أو ألاقى حل ياربى
يزيل عنى الغبار

انا قلت ياله بينا
معرفة الندل عار
واللى يمشى فى طريقه
يبقى فعلا حمار
علشان يفهما صح
لازم له كام سونار
يعرف منهم حقيقته
ويعرف معنى العمار
وأيه اصول الصحبة
والعيشه ويا جار
ويراضى مراته المسكينه
اللى عقلها طار