جوه الصمت

جوه الصمت
شعر : محمد ضباشه

جوه الصمت تاهت كل أحزانى
ومع الكلام لقيت الرعشة مسكانى
احترت مابين كلامى وبين صمتى
وقررت مره تانيه اعود للسكوت تانى

جوه الصمت كلام يقطع كحد السيف
واحتجاجات متلونه بكل لون للطيف
بس يا خسارة مين يفهم معنى سكوتى
الله يجازيهم فكرنى فى البلد دى ضيف

جوه الصمت صراخ غلابة كتير
بيشقوا نور الصبح بعتله وبأزميل
حتى اللى منهم شايف الحقيقة
أختار يعيش فى البلد دى ضرير


جوه الصمت أطفال بعيون حزينة
حواليهم انوار متعلقة كتير وزينه
وهمة نفسهم فى لعبه يلعبوا بيها
نزلوا الشوارع وقالوا يا حيط دارينا


جوه الصمت طوابير على علاج مجانى
تعالى وروح ميت مرة لما قلت اه يانى
مين فى البلد يا رب يشيل عنى أحزانى
بموت فى طابور العلاج والدوله نسيانى

جوه الصمت وجوه بتتخانق مع نفسها
بيتمنوا يعيشوا بكرامة يوم من نفسها
والدوله تساوى بين الناس فى حكمها
والحكومه تاخدها تحت بططها وفى ضلها

جوه الصمت تعبان بيدس فى العسل سمة
اوعاك تقرب وتاكل قبل ما تشمه
لتروح فطيس وهو بيضحك ولا همه
مافيه فرق بين فصيله دمك وبين دمه


جوه الصمت ياريت تفهم وتدعيلى
يالى عايش على ارضى وحما نيلى
وسهران مشاركنى همومى وساعات ليلى
لما ينصلح حال البلد أبقى ناديلى